തമിഴ് സൂപ്പർതാരം വിജയ്‌യുടെ മകൻ ജേസൺ സഞ്ജയ് ആദ്യമായി സംവിധാനം ചെയ്യുന്ന 'സിഗ്മ' എന്ന ചിത്രം റിലീസിന് ഒരുങ്ങുകയാണ്. ക്യാമറയ്ക്ക് പിന്നിലേക്ക് കടക്കുന്നതിന് മുൻപ് കുട്ടിത്താരമായാണ് ജേസൺ സിനിമയിൽ തുടക്കം കുറിച്ചത്. 2009-ൽ ബി. ബാബുശിവൻ സംവിധാനം ചെയ്ത വിജയ് ചിത്രം 'വേട്ടൈക്കാരൻ' എന്ന മാസ് ആക്ഷൻ സിനിമയിലൂടെയായിരുന്നു ജേസണിന്റെ അരങ്ങേറ്റം. വിജയ്‌ക്കൊപ്പം ജേസൺ ചുവടുവെച്ച "നാൻ അടിച്ചാ താങ്കമാട്ടെ…" എന്ന ചാർട്ട്ബസ്റ്റർ ഗാനം ഇന്നും ആരാധകർക്കിടയിൽ വൻ തരംഗമാണ്.
എന്നാൽ 'വേട്ടൈക്കാര'നില്‍ അഭിനയിക്കുമ്പോള്‍ തനിക്ക് ഒന്‍പത് വയസ്സായിരുന്നെന്നും അന്ന് അഭിനയിക്കാന്‍ പേടിയുണ്ടായിരുന്നില്ല എന്നും പറയുകയാണ് ജേസണ്‍. അന്നില്ലാത്ത പേടി തനിക്ക് ഇന്നുണ്ടെന്നും ജേസണ്‍ പറഞ്ഞു. പേളി മാണി ഷോയില്‍ സംസാരിക്കുകയായിരുന്നു താരം.
‘വേട്ടൈക്കാരന്‍ സിനിമ അഭിനയിക്കുമ്പോള്‍ എനിക്ക് ഒന്‍പത് വയസ്സായിരുന്നു. അന്ന് ചെറുതായതുകൊണ്ട് അഭിനയിക്കാന്‍ പേടിയുണ്ടായിരുന്നില്ല. ഇന്നാണെങ്കില്‍ എനിക്ക് പേടിയാകുമായിരുന്നു. അന്ന് സെറ്റുമായിട്ട് വളരെ കംഫര്‍ട്ടബിള്‍ ആയിരുന്നു. അന്ന് സിനിമ ഇറങ്ങിയതിനു ശേഷം രണ്ടോ മൂന്നോ ദിവസം ക്ലാസില്‍ പോയില്ല. സുഹൃത്തുക്കള്‍ എങ്ങനെ പ്രതികരിക്കുമെന്ന് അറിയാത്തതുകൊണ്ടാണ് പോവാതിരുന്നത്. ഇപ്പോഴും സുഹൃത്തുക്കള്‍ ആയിട്ട് ഒരുമിച്ചിരിക്കുമ്പോള്‍ ആ പാട്ട് വച്ച് എന്നെ കളിയാക്കാറുണ്ട്".- ജെയ്സൺ സഞ്ജയ് പറഞ്ഞു.
അതേസമയം, വിജയ്‌യുടെ മകൻ ജേസൺ സഞ്ജയ് സംവിധായകനാകുന്ന ചിത്രം സിഗ്മ ഒക്ടോബർ 2ന് തിയറ്ററുകളിലെത്തും. ഒരു പക്കാ കൊമേർഷ്യൽ എന്റർടൈനറായി ഒരുങ്ങുന്ന ചിത്രമെന്ന് ട്രെയിലർ നിന്ന് തന്നെ വ്യക്തമാണ്. മൈന്‍ഡ് ഗെയിം ത്രില്ലർ ഗണത്തിൽപെടുന്ന ആക്ഷൻ ത്രില്ലറാകും ചിത്രം. സന്ദീഷ് കിഷൻ നായകനായി എത്തുന്ന ചിത്രത്തിൽ നിരവധി താരങ്ങൾ അണിനിരക്കുന്നു. ലൈക്ക പ്രൊഡക്ഷൻസിന്റെ ബാനറിൽ എ. സുബാസ്കരൻ നിർമിക്കുന്ന ചിത്രം വലിയ ബജറ്റിലാണ് ഒരുങ്ങുന്നത്. തന്റെ 25ാം വയസ്സിലാണ് സംവിധായകനായുള്ള ജേസന്റെ അരങ്ങേറ്റം.
Content Highlights: Vijay’s son has opened up about his experiences with ‘Vettaikaran’, recalling that he was initially worried about what his friends would think.